Hia nau em ol EMTV nesenel nius hetlain long tok pisin…
1.PRAIM MINISTA TOK OPOSISEN NOGAT SAPOT
Praim Minista, Peter O’Neill, i tok gavman bai stap yet, maski oposisen i redi long muvim wanpela vot i nogat bilip.
Mista O’Neill i mekim dispela toktok aste bihain long Oposisen i tokaut olsem ol i go long kot long singautim palamen i mas sindaun gen.
Gavman i bin yusim namba bilong en long pasim palamen i go inap mun Ogas.
2.GAVANA BILONG ENGA LAIKIM OL SUMATIN BILONG ENGA GO BEK SKUL
Tupela de bihain long birua namel long ol UPNG sumatin na polis, na Gavana bilong Enga, Sir Peter Ipatas, i singaut gen long ol sumatin bilong Enga i mas go bek long skul.
Gavana Ipatas i tok ol sumatin i autim pinis tingting bilong ol, na nau i stap long han bilong ol lida na gavman ejensi long stretim ol samting.
Gavana Ipatas i tokim EMTV Nius, olsem pasin ol sumatin i mekim i kamapim planti kain bihet pasin long ol arapela hap long kantri.
3.LAIP TAIM YU NOGAT HAN
I no olgeta taim bai yu harim stori bilong ol manmeri i no wankain olsem ol gutpela manmeri.
Planti long ol dispela lain turangu i save bungim planti ol pasin rabisim long ol arapela.
Tasol wanpela mangi, tenpela krismas bilong en, i gat strongpela bilip.
Mama i bin karim David Esra, na em i nogat tupela han bilong en.
Na taim em i liklik yet, David i strongim tingting bilong em yet long yusim tupela lek na fut bilong en long mekim wankain samting ol gutpela manmeri i ken mekim.
NA LONG SPOT NIUS BILONG TETE:
4. PNG STRONGIM TINGTING LONG REDI LONG NU SILAN
Papua Niugini i mekim histri taim ol i rausim Samoa long kisim spes long Gren Fainal bilong OFC Nesens Kap.
Tumora nait, bai PNG i bungim Nu Silan long Gren Fainal bilong Nesens Kap.
Papua Niugini Kepten, David Muta, i tok ol mangi bilong em i bilip strong olsem sapot bilong Mosbi i ken givim ol inap strong long salensim na daunim Nu Silan.
Kosa bilong Nu Silan, Anthony Hudson, i tok maski Kepten bilong ol Chris Wood bai no inap pilai, sait bilong em i strong yet, na ol bai redi long bungim PNG.
https://youtube.com/watch?v=t_mB4DXKS7E%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
