Hia nau em ol nius long tok pisin:
1. PRAIM MINISTA O’NEILL WARI LONG OL SUMATIN
Praim Minista Peter O’Neill tete avinun i salim tok sori bilong en i go long ol sumatin i kisim bagarap aste.
Mista O’Neill i tokim midia tete olsem hevi we i bin kamap long UPNG i no bihainim laik bilong gavman.
Em i askim ol UPNG sumatin long stopim boikot bilong ol, na go bek skul.
Em i tok nau i stap long han bilong polis long painimaut wanem samting i kamap aste, na tu, i gat wanpela komisin ov inkwairi long glasim.
2. NESENEL SEKYURITI KOMITI BUNG LONG GLASIM UPNG HEVI
Nesenel Sekyuriti Advaisari Komiti, tete i bung namba wan taim long glasim olgeta samting i kamap aste long Yunivesiti bilong Papua Niugini.
Wok bilong dispela advaisari komiti em long givim tok stia long Nesenel Sekyuriti Kaunsil, we siaman bilong en, em Praim Minista.
Bihain long dispela namba wan kibung bilong komiti, Sif Sekretri bilong Gavman, Isaac Lupari i tokaut olsem komiti i kisim olgeta stori long Vais Sansela bilong UPNG, Profesa Albert Mellam, na Polis Komisina, Gari Baki.
3. SAS BILONG LOYA MAN FELIX KANGE I SENIS
Loya man, Felix Kange, em polis i bin sasim em long abrus na kilim dai meri bilong em wantaim gan, tete i lukim sas bilong en i senis i go ‘murder’, o kilim man stret.
Em i bin kamap long kot tete.
Kange i bin kisim namba wan sas olsem ‘manslaughter’ o asua na kilim man, bihain long dai bilong meri bilong em long mun i go pinis.
Tasol nau dispela sas i senis bihain long polis i painim moa evidens i soim olsem em i bin kilim meri bilong em.
4. POLIS LONG LAE TOK OL BAI STRONGIM TOKTOK WANTAIM OL YUNITEK SUMATIN
Polis long Lae i tokaut tete olsem ol bai go het yet wantaim gutpela pasin toktok wantaim ol sumatin lida long Yunitek.
Lae Metropolitan Suprintenden, Anthony Wagambie, i tok polis i stap ausait long get bilong Yunitek long lukautim laip bilong ol sumatin na ol samting bilong yunivesiti yet.
Wagambie i tok ol sumatin long yunitek i noken lukim polis olsem ol birua bilong ol.
NA LONG SPOT NIUS BILONG TETE:
3. PNG BUKIM SPES LONG OFC NESENS KAP FAINOL
Bihain long 43 yia, Papua Niugini bai stap gen insait long OFC Nesens Kap fainal, bihain long ol i daunim Solomon Ailans 2-1 aste nait long Sir John Guise Stedium long Mosbi.
Nau bai PNG i redi long bungim ol rijenal sempion Nu Silan long fainal, bihain long ol i rausim Nu Kaledonia 1-nil long namba wan semi fainal pilai.
