Tok Pisin Nius

5 Epril | EMTV Nesenel Nius Long Tok Pisin


Hia nau em ol nius long tok pisin…

1. OL ENGA LAIKIM WAN MILIAN KINA KOMPENSESEN

Sampela ol lain Enga i stap long Mosbi i askim K1 milian kompensesen long ol lain manmeri long ples Baruni, bihain long sampela ol yut long Baruni i bin paitim wanpela man Enga.
Dispela man Enga ol i paitim, nem bilong en, Jeffery Turia, i bin draivim kar i go olsem long Baruni, na ol yut long hap i bin paitim em.
Dispela ol lain Enga emo l lain Itale. Ol i laikim bai ol Baruni manmeri i givim ol K1 milian, o graun inapim dispela manimak.

2. MARAPE NO LAIKIM TRAIBOL PAIT

Memba bilong Tari-Pori na Fainens Minista, James Marape, i askim pinis provinsal administreta bilong en long rausim olgeta pablik sevan na liklik bisnisman i wok long strongim ol traibol pait i kamap long ilektret bilong em.
Minista Marape i tok kros namel long ol wanwan hauslain i save pinisim 30 pesen samting long ol Distrik Sapot mani. Dispela moni em memba i ken yusim long bringim sevis, nau ol i wok long pinisim long ol traibol pait.

3. SUPRIM KOT HOLIM PASPOT BILONG OL SAINA

Suprim Kot i holim paspot bilong etpela ol Saina manmeri em polis i sasim ol long salim ol giaman stua samting.
Jastis Panuel Mogish i mekim dispela oda tete long Waigani Nesenel Hauskot long Mosbi. Dispela ol lain Saina, husat i wok long wanpela Saina stua long Erima long Mosbi, nau bai mas sanap kot yet.

NA LONG SPOTS NIUS:

1. PNG JUDO PAITMAN OVINOU KARIM NEM

PNG JUDO paitman, Raymond Ovinou, bai pait long Fraide long 66kg divisen long Osienia Judo Sempionsips na Trening Kem long Kenbera, Australia.
Ovinou bai resis wantaim foapela arapela paitman bilong Australia, Nu Kaledonia na Frens Polinisia.
Raymond i wok long mekim trening bilong en long Tsukuba Yunivesiti long Tokyo, Japan, stat long mun Februari yet.

EM TV,PNG,5 Epril | EMTV Nesenel Nius Long Tok Pisin,PNG NEWS,PNG TV,EMTV NIUS,TOK PISIN,TOK PISIN NIUS,PAPUA NEW GUINEA

Related posts

20 Julai | EMTV Nesenel Nius Long Tok Pisin

EMTV Online

15 Disemba | EMTV Nesenel Nius Long Tok Pisin

EMTV Online

11 Mei | EMTV Nesenel Nius Long Tok Pisin

EMTV Online

Leave a Comment

error: Content is protected !!