Hia nau em ol nius long tok pisin:
1. PRAIM MINISTA LONSIM MAUN HAGEN SITI ATORITI
Praim Minista, Peter O’Neill, tete i lonsim Maun Hagen Siti Atoriti.
Dispela atoriti bai gat wanpela Sif Ekseketiv Opisa, husat bai ripot i go stret long Nesenel Ekseketiv Kaunsil.
Memba bilong Hagen, na Minista bilong Stet Enteprais, William Duma, em i holim wok siaman bilong Atoriti.
2. POLIS MEKIM WOK PAINIMAUT LONG POLIS PAITIM NOGUT WANPELA MAN
Polis Fos i tokaut tete olsem ol bai go het wantaim wok painimaut long painim sampela ol polisman i bin werim yunifom na paitim nogut tru wanpela man. Dispela vidio i soim ol i yusim wanpela hap ain long paitim dispela man.
Polis Intenal Afes Dairekta, Robert Ali, i no wanbel long pasin bilong dispela ol polisman.
Nau polis i wok askim dispela man ol polis i bin paitim em, na famili bilong en long toktok wantaim intenal afes dairektoret o Polis Midia Yunit, long helpim ol wantaim dispela wok painimaut.
3. NUPELA LOA BILONG INTANET GAT BIKPELA MEKIMSAVE
Wanpela nupela loa we gavman i laik kamapim long was long ol samting ol manmeri i raitim na tokaut long intanet, i gat ol strongpela mekimsave.
Dispela Cybercrime Bill 2016 bai namba wan kain loa olsem long kantri.
Ol mekimsave long husat manmeri i raitim samting we i bagarapim narapela i ken inapim K10,000 na 15 yia kalabus.
Sapos yu save olsem yu mekim tok giaman, na yu go het yet long raitim dispela tok giaman long intanet, na bagarapim nem bilong narapela, bai mekimsave i go antap moa.
NA LONG SPOTS NIUS:
1. PNG ANDA 20 TIM BILONG OL MERI REDI LONG OL BIKPELA PILAI
PNG Anda 20 tim bilong ol meri bai skelim strong bilong ol agensim USA na Japan long mun Mei.
Het Kosa bilong ol, Lisa Cole, i tok tim i wok long tren strong, tasol i hat long save long strong bilong ol arapela tim we ol i no bungim bipo.
EMTV, PNG TV, PNG, PAPUA NEW GUINEA, TOK PISIN NIUS,26 Epril | EMTV Nesenel Nius Long Tok Pisin
