Hia nau em ol EMTV nesenel nius hetlain long tok pisin…
1.OL YUNITEK SUMATIN LUSIM SKUL BIHAIN DAI
Ol sumatin long Yunivesiti ov Teknoloji long Lae i wok long lusim skul yet bihainim kilim dai bilong wanpela fes yia sumatin long Sarere nait.
Maski ples i sindaun isi gen, Yunitek administresin i singautim polis long was long ol sumatin na samting bilong yunivesiti yet.
2.MADANG SANAPIM POLIS TRENSNESENEL KRAIM YUNIT
Madang taun nau i sanap wantaim Vanimo na Nesenel Kapitel Distrik, long gat wanpela transnesenel kraim yunit bilong polis.
Dispela nupela yunit, em Australia Gavman i halivim long sanapim.
Dispela nupela yunit bai glasim na painim ol nupela kain raskol pasin i wok kamap long ol arapela kantri, bihainim olgeta nupela kain teknoloji o save.
3.WELPAM SAPOTIM KOMYUNITI
Krai bilong kisim ol gutpela helt sevis i kam long pipel bilong ples Konoagil, long Nu Ailan provins, nau i karim kaikai.
Million Plus Koporesin, em wanpela welpam divelopa, na papagraun kampani Laka Forest Development Limited, i bungim han long sanapim tupela sab helt senta insait long ol ples Kumin, na Kandas.
Dispela kain wok nau planti ol divelopa i wok mekim long strongim ol pipel na komyuniti long ples we ol i mekim wok bisnis long en.
NA LONG SPOT NIUS BILONG TETE:
4.SWIMMING BAI NOGAT LONG KIMBE PNG GEMS
Namba 7 PNG Gems bai no inap long lukim spot swimming i stap long en.
Maski swimming i bin kamap namba wan taim long 2014 long Lae, dispela yia long Kimbe, bai nogat, bikos ol i nogat ol gutpela ples bilong holim dispela kain spot resis.
