Hia nau em ol EMTV National Nius hetlain long tok pisin…
1.LAE POLIS HOLIM OL MADANG TRABELMAN
Polis long Lae i holim pasim tripela saspek, ol I tok em ol trabelman I bagarapim wanpela Saina bisnisman long Madang.
Dispela birua I kamap long Madang, em I kamap long ai bilong pablik, na ol sekyuriti kamera.
Polis I tok ol dispela man I bin redi long karimaut wanpela holdap long wanpela bikpela supamaket long Eriku, taim ol I holim pasim ol.
2.MARIWANA NA PASIN REIP GO BIKPELA LONG KEREMA
Pasin bilong hait na salim mariwana o spak brus, na pasin bilong reip o bagarapim ol meri I wok long go bikpela long Malalaua distrik long Kerema.
Ol polisman long Malalaua I tokim EMTV olsem ol I nogat kar o bot long patrol na holim ol man nogut.
Ol polisman I tok ol I wari long ripot I kamap olsem hait na salim mariwana na pasin reip i wok long go bikpela.
3.SENTRAL PROVINS BAI GAT HAUS SIK BILONG EM YET
Laip bilong ol manmeri long Sentral provins bai senis klostu, taim wok long wanpela nupela Sentral Provins Haus sik bai go het.
Sentral provins Gavana, Kila Haoda, I tok plen bilong haus sik I stap pinis, na I kisim tok orait bilong Sentral Provinsal Gavman.
Mista Haoda I tok graunwok bai kirap na wok bai ron insait long dispela yia yet.
Dispela haus sik bai sanap long ples Bautama, ausait long Mosbi Siti.
4.OL REFUJI BAI SINDAUN LONG PNG
Samting olsem 450 refuji I kisim tok orait pinis long stap sindaun long PNG.
Ol dispela refuji, nau I stap long Manus Rijenal Prosesing Senta. Ol bai stap long hap inap gavman I painim wok bilong ol long Lae, Madang, na Pot Mosbi.
Aninit long tok wanbel namel long Australia na PNG, ol lain husat I tru tru refuji, bai no inap go sindaun long Australia. Nogat. Ol bai sindaun long Papua Niugini, o narapela kantri.
Deputi Sif Maigresen Opisa, Esther Gaegaming, I tok gavman I wok long wokbung wantaim rikrutmen kampani, JDA Wokman, long painim wok bilong ol dispela refuji.
NA LONG SPOTS NIUS:
5.WELINGTON ALBERT STAP LONG PANTHERS LAINAP
PNG Kumul, Wellington Albert, I kisim luksave long stap insait long Penrith Panthers tim, husat bai brukim bun wantaim ol SP PNG Hunters, long dispela wiken I kam.
Tim bilong Panthers bai kamap long Mosbi long Fraide, long pilai agensim ol Hunters, long opim Nesenel Futbol Stedium.
6.NOGAT NAMBA BILONG OL SPOT LONG KIMBE GEMS
Ol wok kontrak I go aut pinis long bildim ol spots pilai ples long Kimbe, Wes Nu Briten, bilong Namba 7 PNG Gems, tasol Ogenaising Komiti na PNG Spots Faundesen I no tok klia yet long hamas spot bai stap insait long gems.
PNGSF I tok bikpela salens long Kimbe em long lukautim wokabaut na stap bilong olgeta provinsal tim, tasol sapos I gat wanpela namba bilong ol spot ol bai pilai, bai em I isi moa long stiaim ron bilong Kimbe Gems.
https://youtube.com/watch?v=GHvjlorJMB0%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
