Hia nau em ol nius long tok pisin:
1. KOT ASKIM WATPO NA OL SOLDIA NO STAP LONG BOMANA
Sasim bilong Atoni Jeneral, Ano Pala, Jas Sir Bernard Sakora, na Loya meri Tiffany Twivey dispela wik i tromoi planti askim i go long tingting bilong ol manmeri.
Planti long ol nau i lukluk long ol dispela ol kot long ron na pinis.
Dairekta bilong Nesenel Frod na Enti-Korapsen Dairektoret, Matthew Damaru i go pas long ol dispela wok painim na sasim.
Em i tok ol bai sasim planti moa lain manmeri.
2. TOK PAIT LONG PASIN KORAPSEN LONG LOGING INDASTRI GO STRONG
Tok pait long pasin korapsen insait long loging indastri bilong kantri, i go bikpela gen.
Ol Sivil Sosaiti Ogenaisesen long kantri i no wanbel long bekim bilong Forestri Minista, Douglas Tomuriesa, long ol sut tok olsem planti ol loging kampani i wok long abrusim takis na kisim ol diwai i go aut long kantri.
3. WOK I KIRAP LONG BENA-RAMU ROT
Wok i kirap pinis long rot we bai bungim Bena distrik long Isten Hailens, na Ramu, long Madang.
Memba bilong Unggai-Bena, na Minista bilong Graun, Benny Allan, i tokaut long kirap bilong ol dispela wok tude.
Dispela rot bai ron brukim ol ples we bipo i no lukim wanpela rot i go long en.
NA LONG SPOTS NIUS:
1. PNG GOLF OPEN KISIM LUKSAVE
Papua Niugini Golf Open i winim luksave olsem namba wan tonamen bilong dispela yia.
Em i kisim 2015 Queens Land Professional Golfers Tournament bilong America or PGA awod.
Jeneral Menesa bilong SP Brewery, husat i save sponsaim dispela bikpela golf resis, Stan Joyce, Mark Stallard bilong Royal Pot Mosbi Golf Klab, na Spots Minista, Justin Tkatchenko, i bin stap long kisim dispela awod na luksave.
EM TV,PNG,13 Epril | EMTV Nesenel Nius Long Tok Pisin,PNG NGO,PNG TV,EMTV NEWS,TOK PISIN, PAPUA NEW GUINEA,
