Hia nau em ol EMTV nesenel nius hetlain long tok pisin…
1. UNITECH STRONG YET LONG PINISIM GUT SKUL YIA
Administresin bilong Yunivesiti ov Teknoloji o Yunitek, i strong yet long ol sumatin i mas pinisim skul bilong ol long dispela yia.
Maski ol bikhet lain i bagarapim ples kaikai bilong skul, menesmen bilong Yunitek i strongim tingting pinis long inapim dispela skul yia.
Ol i sanapim pinis wanpela haus sel ol sumatin i ken yusim long kaikai, na ol i wok sekim ol arapela rot long bungim moni long kamapim na pinisim gut namba tu semesta o hap bilong dispela yia, 2016.
Gavana bilong Morobe, Kelly Naru i wokabaut raun long Yunitek aste, na em i tromoi askim i go long olgeta lida bilong ol Enga na Sauten Hailans long sapotim wok stretim long yunivesiti.
2. KATOLIK SIOS WARI LONG OL I PASIM YUNIVESITI OV PNG
Katolik Bisops Konprens, o maus ogenaisesen bilong Katolik Sios long PNG na Solomon Ailans, i tok ol i belwari long pasim bilong UPNG, long wanem, ol i tok dispela bai lukim planti tausen yangpela manmeri i nogat wok na nogat inap skul.
Jeneral Sekretri, Pater Victor Roche, i tok olsem maski em i wanpela bikpela disisen tru, bai gat moa hevi bai kamap long komyuniti long ol UPNG sumatin i no pinisim skul, na i no inap painim wok.
3. MAPRIK DISTRIK LUKLUK LONG KAU NA PIK
Maprik distrik long Is Sepik Provins, long tupela yia i go pinis, i wok redim em yet long bikpela ol wok bisnis bilong kirapim distrik i go long bihain taim.
Long sanap long as bilong ol dispela wok divelopmen, Maprik i lukluk long lukautim na salim ol bulmakau na pik.
Tupela bikpela projek bilong lukautim bulmakau na pik i kisim tok orait pinis, na klostu bai ol i kisim ol pik na kau long kamap long pinis bilong dispela mun.
NA LONG SPOT NIUS BILONG TETE:
4. OL PNG KIKBOKSA REDI LONG BIKPELA PAIT LONG SIDNI
Sevenpela kikboksa bilong Nesenel Kapitel Distrik bai lusim kantri dispela Fraide, long go na pait long Sidni, Australia.
Dispela bai namba wan taim dispela tim bai go ausait long kantri long pait.
Tim bai go aninit long lukaut bilong Kosa bilong ol, Mark Sondo, em yet wanpela kikboksa, husat bai pait tu long dispela tonamen, we ol bai pait agensim olgeta ol namba wan kikboksa bilong Australia.
