Hia nau em ol EMTV nesenel nius hetlain long tok pisin…
1.ROTBRUK MANIMAK
Ol enjinia saveman bilong Woks dipatmen I tok rot bruk namel long Kainantu na Yonki, bai nidim manimak inap long K5 milian long stretim.
Long Trinde las wik, dispela hap rot I bin bruk bihainim bikpela ren na taitwara.
Dispela rotbruk I apim manimak bilong hevi long Isten Hailans provins.
2.TAITWARA LONG BULOLO
Long Bulolo long Morobe provins, bikpela taitwara I bagarapim ol gaden kaikai na daunim ol haus bihain long bikpela ren I pundaun klostu wan wik olgeta.
Bulolo distrik nau I wok long yusim ol kanu long karim ol manmeri long haus bilong ol, I go olgeta long ol bikpela rot.
Ol skul pikinini tu I no go skul bihainim ol birua bilong dispela taitwara.
2.OL PNG LNG PAPAGRAUN BELHAT LONG DPE
Ol papagraun bilong PNG LNG Projek I autim belhat bilong ol long ol wokmanmeri bilong Dipatmen bilong Petrolium na Eneji.
Ol papagraun I tok wok pasin bilong ol DPE wokman I no gutpela.
Dispela ol toktok I kamaut tude long namba wan bikpela miting namel long gavman na ol papagraun.
Libe Parandali, em mausman bilong ol PDL 1 papagraun, I tok pasin bilong ol opisal long dipatmen I no kamap long mak we em I mas stap long en.
Dispela namba wan kibung I lukim planti ol papagraun I kamap, na I bihainim tingting bilong nupela Minista bilong Petrolium na Eneji, Ben Micah.
4. HOMBRU EM I BIKPELA HEVI YET
Pasin bilong kukim, salim na dring hombru, em I bikpela yet na I stap long as bilong ol kain pasin olsem reip, kilim man, na ol bikpela traibol pait.
Dispela pasin bilong hombru, em bipo em I samting ol yangpela man tasol I save mekim.
Tasol tude, I gat planti ol meri tu I wok mekim dispela kain pasin.
NA LONG SPOTS NIUS:
1.HAUSPLES BILONG SP HUNTERS I NO KLIA YET
SP PNG Hunters klab I nogat ples bilong tren na stap long en yet.
I gat tupela wik nau I stap bipo long kirap bilong nupela Kwinslen Kap Ragbi Lig Sisen, na ol Hunters I no kisim klia toksave long wanem stedium, ol bai sindaun long en.
Bihain long ol I stap tupelo yia long Kokopo, Hunters I bin muv I kam long Pot Mosbi, na PNG Ragbi Futbol Lig I wok long paitim tok wantaim ol menesa bilong Sir John Guise Stedium, na Nesenel Futbol Stedium long wanem hap ol bai stap.
https://youtube.com/watch?v=53PdBRb-FOE%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
