Hia nau em ol EMTV nesenel nius hetlain long tok pisin…
1. PNG PORTS BAI KISIM SAVE LONG SAINA
PNG Ports Koporesen I sainim pinis wanpela tok orait long wokbung wantaim Shenzhen long Saina.
PNG Ports Sif Ekseketiv Opisa, Stanley Alphonse, I tok PNG I ken lainim planti samting long Shenzhen, we I bin kirap olsem wanpela liklik ples bilong painim pis, na em I groa inap em I kamap namba wan bikpela ol sipbris long wol.
Dispela tok wanbel bai opim dua long ol sans bilong kisim moa save long sipbris bisnis na wok bisnis namel long tupela kantri.
2. SOLOMON AILANS PM KAMAP LONG MOSBI
Praim Minista bilong Solomon Ailans, Manasseh Sogavare, I kamap long Mosbi tude.
Long wok bilong en olsem Siaman bilong Melanesien Spiahet Grup (MSG), Praim Minista Sogavare I no westim taim, na I bung wantaim Foren Afes bilong PNG Rimbink Pato, long wok bilong MSG.
Praim Minista Sogavare bai bung wantaim Praim Minista Peter O’Neill tumora.
Insait long ol toktok wantaim PNG gavman, em posisen bilong Sekretri Jeneral bilong MSG, ol mani kontribusen bilong ol memba kantri.
3. MOA ROT LONG YANGORU SAUSSIA
Ol manmeri bilong ples Inahombi, long Yangoru Saussia distrik long Is Sepik, I tok tenkyu long Lokol memba bilong ol, long sanapim gut ol bikpela sevis.
Ol projek olsem rot, helt na edukesen sevis, em ol bikpela samting long groa na divelopmen.
Ol manmeri long ples I tok strong olsem ol bai wokbung wantaim Mista Maru long mekim Yangoru-Saussia I kamap model o piksa distrik insait long Is Sepik provins.
4. ENGA PROVINS BAIM BALUS RON
Enga provinsal gavman I baim olgeta balus pe bilong en long lukim Link PNG balus ron I go insait long Enga provins.
Gavana Sir Peter Ipatas, I tok dispela hap mani bai lukim gutpela balus sevis bilong ol pipel long Enga long go kam long ples Wapenamanda.
NA LONG SPOTS NIUS:
1. WAN MILIAN KINA KLAB
Ol Lae City Dwelllers I kisim pinis wan milian kina mani halivim I kam long Morobe Provinsal Gavman.
Tutumang I tok oraitim dispela disisen long givim mani long sempion soka klab bilong provins.
Gavana Kelly Naru I givim dispela mani long klab menesmen tete moning.
Em I tokim klab olsem ol I mas yusim stret dispela mani, na ol I mas givim ripot long olgeta mani ol I kisim pinis..
https://youtube.com/watch?v=jlHyqFWw7sg%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
