Hia nau em ol EMTV nesenel nius hetlain long tok pisin…
1.BIKPELA STIL PASIN KAMAP LONG BIK MONING LONG LAE
Moa long 5-pela man i yusim wanpela pamp eksen sotgan, na wanpela M16 pait gan long stilim bikpela hap moni long Z na H Koporesen long Lae, long tete moning.
Ol dispela stilman i bin stap insait long stoa yet, taim ol sekyuriti gad i painim ol na ronim ol.
Tupela long ol stilman, em ol sekyuriti i holim ol taim ol arapela wanlain bilong ol i ronawe lusim ol.
2.BUIMO HAUS KALABUS GAT BIKPELA DINAU
Administresin opis bilong Buimo Haus Kalabus i tok em i gat dinau moa long 1 milian kina, i stap wantaim ol kampani i save givim kaikai long ol kalabusmanmeri.
Tasol dispela em i wanpela hap bilong bikpela dinau ol i gat.
Wara na pawa bil bilong ol i stap yet, na ol i tokaut olsem bai gat bikpela dinau tu i stap yet wantaim Telikom.
3.EDA RANU RAUSIM SKELIM WARA PROGREM LONG MOSBI SITI
Kampani i save bosim wara long Mosbi Siti, Eda Ranu, i tokaut pinis long ol i rausim skelim wara program bilong ol tete, bihain long mak bilong wara long Sirinumu Dem i go antap liklik.
Tasol Eda Ranu i givim strongpela tok lukaut olsem ol lain ples i stap ausait long siti, i mas skelim gut wara na yusim.
Long wankain taim, Eda Ranu i singaut long olgeta ol bisnis na gavman opis long stretim olgeta dinau bilong ol long wara.
NA LONG SPOTS NIUS:
1.NELSON STONE LUKLUK LONG RIO
Rekot holda bilong 200m long PNG, Nelson Ston, nau i lukluk strong long Rio Olimpik Gems.
Long redi long Rio Gems, Ston nau i wok long tren long resis insait long namba 78 Singapore Open Track and Field Sempionsip, we bai kamap long pinis bilong dispela mun, long Singapore.
25 Epril | EMTV Nesenel Nius Hetlain Long Tok Pisin, em tv, tok pisin nius, png tv, png tok pisin nius, png nius,
