Hia nau em ol nius long tok pisin:
1. OPOSISEN BAI TRAIM VOT NOGAT BILIP NAMBA FOA TAIM
Palamen Oposisen bai traim vot i nogat bilip mosen long palamen namba foa taim.
Tete, Deputi Oposisen Lida, Sam Basil, wantaim Memba bilong Lae, Loujaya Kouza, i bin givim olgeta pepa bilong inapim dispela mosen, i go long han bilong deputi spika, Aide Ganasi, tete moning.
Maski klostu taim bai kantri i bungim nesenel ileksen, ol memba bilong Oposisen i strong yet olsem ol i mas senisim lida bilong gavman.
Ol i tokim EMTV olsem ol bai muvim dispela mosen dispela wik yet.
2. ASKIM KAMAP LONG WESTEN PROVINS ROT
Wok long wanpela nupela rot bilong namel long busples Oksapmin, na Westen provins, i kamap tete long palamen.
Wes Sepik Gavana, Amkat Mai bin askim Praim Minista Peter O’Neill long tok klia long wanem mak wok long dispela rot i stap long en.
Gavana Mai i tok balus birua we i bin kilim 11-pela manmeri long Oksapmin, i no nap long kamap sapos i bin gat rot we ol inap long bihainim long kamap long Kiunga.
Praim Minista O’Neill i tok pinisim bilong dispela rot i sanap long moni we bai kam long takis kredit skim namel long gavman na Ok Tedi Maining Limitet.
3. WOKS MINISTA TOK NOGAT SOTKAT LONG STRETIM HEVI BILONG ROT
Minista bilong Woks, Francis Awesa, i tok i nogat sotkat long stretim olgeta hevi bilong rot long kantri.
Em i tokaut tete long Palamen, olsem Ministri bilong Woks i wok long sanapim wanpela Rot Mentenens Fan long halivim baset moni bilong lukautim olgeta nesenel rot.
NA LONG SPOT NIUS BILONG TETE:
3. PNG BAI REDI GUT LONG BUNGIM SOLOMON AILANS
Papua Niugini nau i wok long strongim trening bilong ol long redi long bungim Solomon Ailans long namba wan gem bilong ol semi fainol bilong OFC Nesens Kap.
PNG i bin bagarapim tru Samoa long Sande, taim ol i skorim 8-pela gol.
Solomon Ailans i gat moa save long pilai intanesenel futbol, na PNG i no abrus long dispela luksave.
Laspela taim tupela tim i bin brukim bun, em long Honiara long mun Mas. Ol i bin pilai tupela gem, na wanwan kantri i winim wanwan gem.
https://youtube.com/watch?v=3KjBtzeB3iA%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
