Hia nau em ol nius long tok pisin…
1. PM TOKTOK WANTAIM AUSTRALIA MIDIA
Praim Minista Peter O’Neill, aste I stori wantaim Nesenel Pres Klab bilong Australia long Kenbera.
Em i stori long wok PNG I mekim long Pasifik, na strong bilong en olsem kantri I karim planti ol wankain salens olsem ol arapela kantri long wol.
Em I tok gavman I mekim sampela bikpela disisen long katim manimak bilong gavman na tu long inapim olgeta sevis I go long pipel.
2. SENIS I KAMAP LONG BUIMO
Bikpela hevi long Buimo we I lukim 12-pela kalabus man I lusim laip, I mekim men’smen bilong Koresenal Sevis long mekim sampela senis long Buimo.
CS Komisina Bernard Nepo, I tokim EMTV olsem ol kalabus I wetim kot nau bai gat banis bilong ol yet, na taim bilong holim ol bai no inap long abrusim 12-pela mun, o wanpela yia.
3. SLARI PAIP BRUK LONG RAMU NIKEL PROJEK
Long Madang, wanpela long ol paip bilong karim pipia bilong nikel long Kurumbukari main sait, I go long Basamuk Rifaineri long Madang provins, I bruk na pipia wara I wok bagarapim busgraun long hap.
Ol asples manmeri I tok olsem paip stat long lusim wara las wik yet long Sande, tasol bihain long ol I kam sekim, ol bosman bilong kampani I tokim ol manmeri olsem em I samting nating. Nau long Trinde dispela wik, pait I bin pairap.
NA LONG SPOTS NIUS:
1. KATO OTTIO BOSIM WING BILONG RAIDERS
Bihain long em I sainim wanpela tupela yia kontrak wantaim Canberra Raiders, bipo SP Hunters, Kato Ottio, I winim winga posisen long Nu Saut Wels Kap Said bilong Raiders.
Em bai bosim win taim ol I bungim Penrith Panters tumora.
https://youtube.com/watch?v=SpUcHEwGYnk%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
