Hia nau em ol nius long tok pisin:
1. UPNG KAUNSIL PASIM SEMESTA WAN
UPNG Kaunsil i pasim pinis Semesta Wan bilong skul, bihainim longpela taim ol sumatin i no skul.
Dispela disisen nau bai lukim yunivesiti i pasim dua bilong en, inap taim ol i makim taim bilong semesta namba tu long go het.
Ekting Sansela, Dokta Nicholas Mann, i tokim ol sumatin tete apinun, olsem dispela disisen i gutpela bilong UPNG yet, na tu, ol sumatin, husat i ken yusim dispela taim bilong malolo na stretim tingting bilong ol.
2. OL UPNG SUMATIN TOK OL BAI GO HET YET WANTAIM OL ASKIM
Toksave long pasim bilong semesta wan bilong UPNG, i no daunim bilip bilong ol sumatin.
Long bekim disisen bilong Kaunsil, Presiden bilong SRC long UPNG, Kenneth Rapa, i tok ol bai go het yet long askim Praim Minista long lusim opis bilong PM, na bai ol i karim dispela askim i go aut long ol wanwan ol provins bilong ol.
Tete, ol sumatin i bin kisim sapot long Nesenel Doktas Asosiesen, husat i tok ol i redi long go het yet long strongim askim bilong ol.
3. FAIN MAK BAI GO ANTAP LONG OL ROT BIRUA
Nupela Rot Trefik Ekt bai larim ol Trafik Opisa long sasim bikpela hap manimak olsem mekimsave long ol papa bilong ol kar husat i no save bihainim ol loa bilong trafik.
Dispela ekt, we Nesenel Palamen i bin tok oraitim long 2014.
Ol i askim olgeta draiva long bihainim loa, bikos nau yet arere mak bilong peim mekimsave, em i sanap long 3 kina. Dispela bai go antap long mak bilong K200 aninit long nupela loa.
NA LONG SPOT NIUS BILONG TETE:
4. SOLOMON AILANS KAMAP PINIS LONG MOSBI BILONG NESENS KAP
Solomon Ailans futbol tim i kamap long Mosbi tete avinun.
Ol liklik lain sapota i bin stap long tok welkam long ol.
Ol i bin lusim Brisben Australia tete, na ol i stap pinis insait long wanpela pul olsem ol birua bilong ol, Vanuatu, Fiji, na Nu Silan.
Tim kepten na bipo Hekari fowet, Henry Faarado, i bin amamas tru long kam bek gen long PNG.
https://youtube.com/watch?v=F2sx-vlfvMw%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
