Hia nau em ol EMTV National Nius hetlain long tok pisin…
1. NOKEN PRET, NA LUKSAVE
Noken pret, na luksave. Dispela em I toksave I kam long Nesenel Helt Dipatmen, na Wol Helt Ogenaisesen, long bruk bilong nupela sik bilong moskito, em Zika vairas we nau I wok bruk long sampela ol kantri long wol.
Nesenel Rispons o Bekim Tim, aninit long stia bilong Dokta Boris Pavlin bilong WHO, na Barry Ropa, husat I makim Saveilens na Imejensi Rispons o bekim opis bilong Helt Dipatmen, I tok ol I wok redi pinis long banisim gut kantri long dispela nupela sik nogut.
Ol bel mama, o ol meri i ken karim pikinini, I ken bungim bikpela hevi long dispela sik.
2. LAS GUTBAI LONG LEIT MARK SAPIAS
Ol lain familI na pren bilong wanpela biknem niusman, Leit Mark Sapias, I mekim ol las tok gutbai bilong ol long Mosbi tude.
Sapias I bin wanpela long ol namba wan niusman long kantri.
Em I bin lusim laip bilong en las wik, bihain long em I bin sik suga longpela taim.
Ol pren bilong en I stori long laik bilong Mak long spots, save bilong em long stori long ol bikpela pilai, gutpela daun pasin bilong en, na pasin bilong em long tok pilai.
3. PNG GAVMAN BAI REJISTAIM OL WES PAPUA
Papua Niugini gavman bai rejistaim olgeta Wes Papua manmeri I stap long kantri moa long 40 krismas pinis, bihain long ol namba wan lain Wes Papua I kalapim boda kam long PNG olsem ol politikal refuji.
Dispela wok rejistresen I kamap bihainim strongpela singaut agensim luksave PNG gavman I givim long ol asailam sika lain I kam aninit long tok wanbel namel long PNG na Australia.
Klostu taim, bai toksave I go aut long wok rejistresen we bai kamap long Lae city bilong ol Wes Papua manmeri I stap long Morobe provins.
4. TOKPLES YOMKAWA I DAI ISI ISI
Ol lapun long ples Butibam long Morobe I wok strong nau long strongim tok ples Yomkawa. Dispela tok ples, en tude, ol lapun manmeri tasol I save yusim.
Ol I pret olsem sapos ol yangpela I no moa yusim dispela tok ples, em I ken dai na lus olgeta insait long tenpela yia tasol.
Nau ol I wokbung wantaim sampela lain I rekodim vidio long dispela tok ples, long traim na holim I stap laip yet, na mekim wanpela tivi stori long en.
NA LONG SPOTS NIUS:
5. RYAN PINI REDI LONG RIO
Supa Pis bilong yumi, Ryan Pini, nau I wok long mekim strongpela trening tru long redim em yet long Olimpik Gems we bai kamap long Rio long Brasil.
Em bai namba 4 taim bilong Ryan long resis insait long Olimpik Gems.
Em bai makim PNG long 100 mita bekstrok, bataflai, na fri-stail.
6. NUPELA HUNTERS I REDI
Nupela SP PNG Hunters skwad I redi nau long opim nupela Nesenel Futbol Stedium.
Las wik, Kosa bilong SP PNG Hunters, Michael Marum, I wok lukluk long ol hap we tim I ken soim liklik strong, tasol nau yet, we I gat tupela moa de tasol I stap bipo long ol I bungim Penrith Panthers, em I makim pinis tim em I laikim.
https://youtube.com/watch?v=kJVpa5ARxAo%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
