Hia nau em ol EMTV nesenel nius hetlain long tok pisin…
1.POLIS STOPIM PROTES MAS LONG MOSBI
Polis tete i stopim protes mas we ol manmeri i laik kamapim long Mosbi siti, long sapotim ol sumatin bilong Yunivesiti bilong PNG.
Enti-Korapsen Ektivis, Bryan Kramer, i tok em na ol sapota bilong en bai go het yet long singaut na askim Praim Minista Peter O’Neill long lusim opis.
Kramer i mekim dispela toktok bihain long ol polisman i bin stopim ol long protes taim ol i bung long Unagi Pak long Mosbi.
2.POLIS OPIM BEK FROD SKWOD OPIS
Ol polis bos tok orait long opim bek Frod Skwad opis pinis.
Tete long apinun, Asisten Polis Komisina Kraims, Jim Andrews i bin go pas long opim bek ol get na dua bilong Frod Skwod, bihain long em i bin pas tripela wik olgeta.
Opim bek bilong Frod Skwad opis bai lukim ol opisa i go het wantaim wok bilong ol, tasol i gat stia tok tu i stap, olsem sapos i gat ol bikpela ‘hai profail’ wok painim i kamap, bai olgeta wok pepa bilong ol dispela ol kes, bai mas kisim glasim long wanpela komiti long sekim strong bilong kes, pastaim long ol i go het long sasim ol manmeri.
3.EDA RANU TOK OL I NO SAPOTIM STRAIK BILONG OL SUMATIN
Planti ol sut toktok i kamap long wiken olsem wara kampani long Mosbi, Eda Ranu, bai sapotim straik bilong ol UPNG sumatin na pasim wara saplai i go long siti, em tete Siameri bilong Eda Ranu, Mary Karo, i tok klia olsem em dispela ol tok, em ol tok giaman.
Misis Karo it ok olsem wok bilong Eda Ranu, em bilong givim wara long siti, na em bai go het long mekim dispela wok yet.
NA LONG SPOT NIUS BILONG TETE:
4. OL PEPES I REDI LONG INTANESENEL SISEN
Ol pilaia bilong PNG Pepes, em nesenel tim bilong ol meri long Netbol, nau i wok long tren strong long redi long ol intanesenel pilai bilong ol.
Kepten bilong PNG Pepes, Lua Rikis, i tok olsem em na ol arapela meri long tim i no malolo long mekim trening bilong ol, bai ol i redi long bungim ol arapela kantri.
https://youtube.com/watch?v=XVtkD9DDkEc%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
