27 C
Port Moresby
April 14, 2021
Tok Pisin Nius

4 Julai | EMTV Nesenel Nius Hetlain Long Tok Pisin

Share the News

Hia nau em ol EMTV nesenel nius hetlain long tok pisin…

 

1. TUTUMANG SAPOTIM KOT KES AGENSIM GAVMAN

Morobe provinsal haus ov asembli, o Tutumang, i tok oraitim pinis kot bilong luksave long wok kontrak bilong ol lokol level gavman presiden long Morobe.

Dispela kot i kamap, long wanem ol LLG presiden long Morobe i wok inap 4-pela yia tasol, na i no pinisim gut 5-pela yia kontrak, long wanem ol LLG ileksen i bin kamap long 2013, na i no long taim bilong ol long kamap, long 2012.

Sapos dispela kot i karim kaikai, planti ol arapela provinsal asembli long kantri i ken bihainim wankain rot, na gavman i ken lusim planti milian kina long baim ol LLG presiden.

 

2. TRESARI MINISTA TOK EKONOMI BILONG KANTRI STAP GUT

Minista bilong Tresari, Patrick Pruaitch, i tokaut olsem maski gat planti tok daunim i kam long politiks, bisnis, na long komyuniti, ekonomi bilong kantri i stap gut yet.

Minista Pruaitch i tok klia olsem PNG i no abrus long bekim olgeta dinau bilong en yet.

Em i mekim dispela tok klia bihain planti sut tok long wanpela 1.5 bilian kina dinau kantri i kisim long wanpela ovasis benk.

 

3. ASPLES LIP TAPAK BAI GO INSAIT LONG SPIA SMUK

Ol asples lip tapak o brus, we ol i save groim long Westen Hailans, nau bai go insait long wokim smuk.

Smuk kampani long kantri, British American Tobacco, i luksave nau long ol lip brus bilong ples Togaba, long Westen Hailans provins, na ol i tok dispela lip brus bai orait long ol i yusim insait long namba wan Spear smuk bilong ol.

Wanpela wokbung namel long B-A-T na ol asples brus fama, nau i givim luksave long ol, olsem ol Komesal Tobako fama.

Bipo, kampani i save kisim ol lip brus o tapak long ol arapela kantri long mekim olgeta smuk bilong ol. Nau bai ol i yusim brus tru bilong PNG.

 

 

NA LONG SPOT NIUS BILONG TETE:

 

4. TOEA WISIL GAT GUTPELA SANS LONG SOIM KALA LONG OLIMPIKS

PNG Spidmeri, Toea Wisil, nau i gat gutpela moa sans long mekim nem long Rio Olimpiks, bihain long namba wan birua bilong em long Australia, Sally Pearson, i tokaut olsem em bai no inap resis long Rio.

Toea Wisil, wantaim Theo Piniau, em tupela etlit tasol bai makim PNG long Brazil long mun Ogas.

Related posts

16 Novemba | EMTV Nesenel Nius Long Tok Pisin

EMTV Online

26 Jenueri | EMTV Nesenel Nius Long Tok Pisin

EMTV Online

10 Jenueri | EMTV Nesenel Nius Long Tok Pisin

EMTV Online
error: Content is protected !!