Hia nau em ol EMTV nesinol nius het lain long tok pisin…
1. NSO BAI MAKIM NAMBA
Ol lain husait i save go pas long kaunim ol manmeri bilong kantri, Nesinal Stetistiks Opis, i tok olsem ol i makim pinis 800 ples long kantri, long kaunim olgeta namba bilong ol manmeri, na mak bilong helt sindaun bilong ol.
Dispela bai givim gutpela piksa bilong stiaim ol wok divelopmen long kantri long ol yia i kam.
Bosman bilong NSO, Roko Koloma, i tokaut tete olsem wok bilong kaunim olgeta namba em i bikpela salens tru, bikos i nogat inap moni long mekim dispela kain wok.
2. TFF MONI BILONG OL SKUL
Ekting Sekreteri bilong Edukesen, DR UKE KOMBRA, I toksave pinis olsem ol skul husait i no bin kisim TFF moni, bai kisim long disepla wik.
Em i tok olsem dipatmen i abrusim taim pinis long stretim dispela ol moni bilong ol skul.
Nau em i askim ol skul husait i no bin kisim moni bilong dispela skul tem long lukautim moni gut long dispela taim ol i stap wetim moni.
3. NIU AILAN GAVMAN BAI MEKIM ROT LONG K28 MILIAN
Gavman i tokaut long stretim ol rot bagarap bilong Namatanai, long Niu Ailan Provins.
Gavana bilong Niu Ailan, SIR JULIUS CHAN, I mekim dispela toktok long opim bilong nupela Yunaited Sios haus lotu long ples Pakinsela, long Namatanai distrik.
Dispela rot mekim bai lukim nesenel gavman na Niu Ailan Provinsal gavman i wok bung wantaim long mekim dispela rot.
Monimak bilong dispela rot em 28 milian kina.
NA LONG SPOTS NIUS:
1. AFL PNG SELEKSIONS
Sileksen bilong makim ol nupela pilaia bilong AFL nesinol tim, PNG MOSQUITOS, i go strong yet long dispela yia.
Nesenel tim nau i stap long strongpela tingting bihainim dispela taitol long holim yet Australian Futbol Intanesenal Kap long mun Ogas, long 2017.
Wok bilong makim trening skwad i kamap pinis bihain long 2014 Intanesinol Kap.
Bikman bilong Futbol Operesens, REX LEKA, i tok olsem AFL PNG i gat tingting long painim ol nupela pilaia long PNG Gems we bai kamap long mun Novemba, long Kimbe.
