Hia nau em ol nius long tok pisin:
1. KOT SALIM OL PNGDF SOLDIA GO LONG BOMANA LONG WETIM KOT
Wanpla ten tri Papua Niugini Difens Fos soldia, husat i sanap kot bihain long ol i no bihainim oda bilong ol opisa bilong ol long lusim wanpela operesen long Sauten Hailans, nau bai mas go stap long Bomana Haus Kalabus long wetim kot bilong ol, long wik i kam.
Bihain long loya man bilong ol i askim kot long surukim beil bilong ol i go yet, Jastis Panuel Mogish i tok ol i mas go wetim kot long Bomana.
Ol dispela lain soldia em kot i bin i givim disisen bilong ol dispela soldia long Jun 1, na ol i bin stap aut long banis inap tete, taim kot i tok namel long nau na neks wik, ol bai mas stap antap long Bomana haus kalabus.
2. POLIS KOMISINA TOK POLIS HAUS HEVI BAI STAP YET
Polis Komisina, Gari Baki, i tok hevi bilong polis i nogat inap haus bai stap yet, maski gavman i gat tingting long apim mak bilong ol polismanmeri inap long ten tausen, bipo long 2018.
Taim em i givim tingting bilong em long stretim fos, Komisina i tok klia olsem bai nogat inap haus slip bilong brukim ol polis man na meri.
Komisina Baki i mekim dispela toktok taim em i opim wanpela nupela haus slip bilong ol polismanmeri long McGregor polis bareks long Pot Mosbi.
3. MOA LONG 200 UOG SUMATIN BILONG MOROBE KAMAP BEK LONG PLES
Moa long 200 Morobe sumatin bilong Yunivesiti ov Goroka, i kamap pinis long Lae, bihain long ol i ronawe long bikpela pait i kamap namel long ol sumatin long UOG.
Ol sumatin i kamap long Lae tete we Gavana bilong Morobe, Kelly Naru, i bin stap long tok welkam long ol.
NA LONG SPOT NIUS BILONG TETE:
3. SEGEYARO LUKLUK LONG BRISBANE BRONCOS
Brisban Broncos klab long Nesenel Ragbi Lig long Australia, em i wanpela klab husat i wok lukluk long James Segeyaro, bihain long Penrith Panthers i bin tokaut olsem ol bai nogat spes bilong en long 2017 sisen.
Bipo hapbek, Peter Wallace, i wok mekim nem long huka posisen taim Segeyaro i bungim hevi na i no pilai.
https://youtube.com/watch?v=uadQ_PM140E%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
