Hia nau em ol EMTV nesenel nius hetlain long tok pisin…
1.JACKSONS PLES BALUS PULAP KAPSAIT LONG BIKMONING
Tete long bikmoning yet taim ol manmeri long Mosbi siti i silip yet, planti handret manmeri bilong Hela provins i kamap long Jacksons Ples Balus long tok gutbai long gavana bilong ol, Leit Anderson Agiru.
Ol i bin kamap long ples balus long 12 kilok bikmoning yet, wantaim tingting bilong kalap long sata balus bilong Air Niugini i go long Hela.
Ol wokmanmeri na sekyuriti gat long Jacksons Ples Balus i tok dispela kain bikpela lain manmeri, em i namba wan taim bilong ol i lukim long Mosbi.
2.OL YUNITEK SUMATIN GIVIM ASKIM PEPA LONG MINISTA BILONG HAUS
Bihain long ol i bin karimaut wanpela gutpela wok awenes long Lae siti aste, ol sumatin lida long Yunitek i bin givim wanpela askim pepa bilong ol. Insait long dispela askim pepa, ol sumatin i askim Praim Minista Peter O’Neill long step daun bai wok painim i ken go het gut. Minista bosim Hausing, Paul Ezekiel, i bin stap long makim praim minista, na kisim dispela askim pepa.
Dispela askim pepa, samting olsem 3,000 Yunitek sumatin i bin sainim.
3.MANUS PROVINSAL GAVMAN WARI LONG BIHAIN TAIM HEVI
I gat planti ol bikpela belwari i stap nau long ol pipel na provinsal gavman bilong Manus provins.
Wari long ol asples manmeri yet i lusim winmani na bisnis bilong ol, nau em i nambawan luksave bilong Manus Provinsal Gavman.
Ol i wari tru olsem planti ol asples we nau yet i holim ol wok long prosesing senta o banis bilong ol asailam sika, bai nogat wok sapos senta i pasim dua bilong en.
Provinsal Administreta, Andrew Posong, i tok ol i bilip yet olsem PNG na Australia gavman i ken givim gutpela rot long halivim ol asples pipel long Manus.
NA LONG SPOT NIUS BILONG TETE:
4.OFC NATIONS KAP BAI LUKIM GUTPELA PILAI
Long Futbol, I gat tupela wik tasol nau pastaim long OFC Nesens Kap i kikof long Mosbi.
Dairekta bilong ol OFC Kompetisen, Chris Kemp, i tok dispela tonamen bai givim gutpela rot bilong ol Pasifik Kantri long soim strong bilong ol na mekim nem long intanesenel level.
