Hia nau em ol EMTV nesenel nius hetlain long tok pisin…
1.KOT ASKIM WATPO NA OL SOLDIA NO STAP LONG BOMANA
Nesenel Kot Jas, Panuel Mogish tete i askim watpo na sikspela PNGDF soldia, we polis i bin sasim ol long kilim dai wanpela sumatin long mun Ogas las yia, i stap long Ami Rumgat long Mari Bareks, na i no stap long Bomana Haus Kalabus.
Jas Mogish i autim dispela belhevi bihain long em i harim olsem dispela sikspela man i stap long han bilong polis bihain long polis i bin arestim ol long namba 16 de bilong mun Mas.
2.POLIS SASIM SINIA JAS LONG PASIN KORAPSEN
Polis tete i sasim wanpela sinia jas bilong Nesenel na Suprim Kot.
Jastis Sir Bernard Sakora, em polis i sasim em long judisal korapsen.
NCD na Sentral Divisenal Komanda, Sylvester Kalaut, i tok polis i painimaut olsem Sir Bernard i bin kisim K100,000 long wanpela kampani, nem bilong en, PKP Nominees Limited long 2009.
Polis i tok dispela kampani PKP Nominees Limited, em i wanpela han bisnis bilong loya Paul Paraka.
Jastis Sakora, husat i bin kisim nupela kontrak long narapela tripela yia i kam, i tok dispela ol sut tok i no tru.
3.AGMARK TOK KAKAO WOK LONG KAM BEK GEN
Wanpela long ol namba wan bikpela kampani long kantri we i save salim kakao i go ovasis, i tok olsem dispela diwai i wok long kisim bek strong bilong en.
Dispela toksave i kamap bihain long kakao indastri i bin bungim bikpela hevi wantaim sik bilong Pod Bora binatang, na hevi bilong bikpela drai.
Long makim kambek bilong kakao, Agmark i tokaut olsem em bai salim 32 bek bilong hai-gred kakao bin i go long wanpela bikpela soklet fektori long ples Adelaid, long Australia tumora, long wanpela Air Niugini balus ron.
NA LONG SPOTS NIUS:
1.TIM PNG MEKIM NEM LONG AUSTRALIA
Swimming tim bilong PNG i wok mekim nem long 2016 Hancock Swimming Sempionsip we nau i kamap long Saut Australia Aquatic na Leisure Senta long Adelaide, Australia.
Ol sima manmeri i makim kantri long hap, em Ryan Pini, Samuel Seghers, Ryan Maskelyne, na Barbara Vali-Skelton.
11 Epril | EMTV Nesenel Nius Hetlain Long Tok Pisin, em tv, tok pisin nius, png tv, png tok pisin nius, png nius,
